ՀՀ դեսպան Վահրամ Կաժոյանի հանդիպումը VietJet ընկերության նախագահի կոմերցիոն գծով տեղակալ Նգույեն Թան Սոնի հետ:

28 հունիսի, 2023

Ս.թ. հունիսի 28-ին ՎՍՀ-ում ՀՀ դեսպան Վահրամ Կաժոյանը Հո Շի Մին կատարած աշխատանքային այցի շրջանակներում հանդիպեց VietJet ընկերության նախագահի կոմերցիոն գծով տեղակալ Նգույեն Թան Սոնի հետ:

Հանդիպման ժամանակ կողմերը քննարկեցին Հայաստանի և Վիետնամի միջև ուղիղ օդային հաղորդակցության հաստատման հեռանկարներն, ինչպես նաև զբոսաշրջության, առևտրային փոխադրումների, մշակութային, համագործակցության հետագա զարգացումն ու խորացումը:

Դեսպան Կաժոյանը ներկայացրեց դեպի Հայաստան և Հայաստանից դեպի Եվրոպա, Մերձավոր Արևելքի և ԱՊՀ երկրներ իրականացվող չվերթների, Երևան ժամանող ու մեկնող ավիաընկերությունների, ինչպես նաև հայկական ավիափոխադրողների մասին տեղեկատվությունը:

Զրուցակիցները երկուստեք կարևորեցին Վիետնամից Հայաստան ուղիղ օդային հաղորդակցության հաստատումը` հույս հայտնելով, որ այն կնպաստի երկու երկրների միջև առևտրա-տնտեսական և զբոսաշրջության ոլորտների հետագա զարգացմանը և երկկողմ ապրանքաշրջանառության ծավալների աճին:

Պարոն Սոնն ընդգծեց, որ VietJet-ը միայն ընթացիկ տարում ընդարձակելու է իր ավիապարկն ավելի քան 30 Airbus A321neo և ավելի քան 10 Airbus A330 նոր ինքնաթիռներով: Վերջիններս հնարավորոթյուն կստեղծեն կատարել ուղիղ չվերթներ Հանոյից կամ Հոշիմինից Երևան:

VietJet ընկերության կոմերցիոն գծով նախագահի տեղակալ պարոն Նգույեն Թան Սոնի հետ հանդիպմանը մասնակցում էին ՀՀ դեսպանության երկրորդ քարտուղար Արամազդ Մուրադյանը և ՀՀ դեսպանի օգնական տիկին Նգույեն Տան Տամը, իսկ վիետնական կողմից՝ VietJet ընկերության կոմերցիոն տնօրեն պարոն Հա Նանգ Վիետը, կոմերցիոն տնօրենի տեղակալ, ցանցային պլանավորման և եկամուտների կառավարման վարչության պետ պարոն Վիետ Ֆամը և այլ պաշտոնյաներ ու փորձագետներ:

Հանդիպման ավարտին VietJet ընկերության կոմերցիոն գծով նախագահի տեղակալ պարոն Նգույեն Թան Սոնն ուղեկցեց դեսպան Կաժոյանին ընկերության վարչական, տեխնիկական ու թռիչքերի կառավարման բաժանմունքներով՝ ներկայացնելով չվերթների կազմակերպման ու կառավարման ամբողջ համակարգը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր